Imaxe: Número Phi
A taekwondista Ekaterina Rebón impón o seu terceiro posto nacional nas categorías sub-21 e sénior
Ekaterina Rebón, membro do Número Phi, logra facerse co bronce sub-21 e sénior durante o Campionato de España de Clubs. A taekwondista clasificábase en semifinais contra A. Arrondo (sub-21) e A. Ortiz (sénior), mais en ambos casos perdeu o combate de acceso á final coas que posteriormente serían as campioas de cadansúa categoría.
A súa adestradora Lúa Piñeiro, histórica taekwondista do noso país e actual dirixente do Número Phi, acompañou a todo o equipo ata Alacante, co que volta cun «sen fin de experiencias» e dúas preseas. Representando ao club estiveron Carmen García, Sabina Vázquez, Marina Castro, Marea Padín, Myriam Chayán e Paula Barral, na categoría cadete; e Ángela Rodríguez, Mara Crespo, Noa García e Paula Gómez, en júnior.
Ekaterina xa ten pegada en Europa
Aínda pertencendo á categoría júnior, a galega xa forma parte do elenco de taekwondistas español, quen contou con ela para asistir ao Campionato de Europa Sub-21, celebrado o pasado mes de novembro en Sarajevo, Bosnia. Sendo unha das representantes máis novas do conxunto vermello, Ekaterina tamén demostrou alto nivel no europeo contra a rival Alisa Potemkina, malia non poder facerse coa vitoria. Ademais, o martes pasado competía na categoría absoluta puntuable para clasificarse no campionato do mundo de 2025.
Deja una respuesta